Aldawen! Adu pay la ti trabajo ni nanang ni Juan ket saan pay a nakatienda isu nga binaon na ni Juan a mapan idiay tiendaan.

"Juan, inka man idiay tiendaan," kinuna na.

"Wen, Nanang, insungbat met ni Juan ket innala na ti kuarta sa nagtaraytaray a napan.

Ngem idi kuan nagsubli.

"Nanang, Nanang!" impukkaw na. "Gumatangak to met ti kankanen ko, ah?"

"Ay, ania ket daytoy nga ubingen! Ala wen, inkan. Darasem ta aldawen."

Kasta unay nga ayat ni Juan. Nagsagsagawisiw a nagna.

Idi nakadanon idiay tiendaan, napan idiay ayan ti aglaklako ti kappi. Nangala iti bislak ket kiniwar na sana pinatitpatit dagiti kappi tapno makita na no sibibiag da met laeng.

"Saan mo bassit a patpatiten dagita kappi ket matay da met laengen, ah," kinuna ti baket nga aglaklako a sipupungtot. "Ibagam no mano ti gatangem ta ikkan ka laengen."

"Wen, Nana. Pangaasim bassit ta dagitay sibibiag ken dadakkel ti ited mo. Ikkannak ti pateg ti uppat a pisos, Nana," insungbat ni Juan.

Insupot na tay kappi sa napan gimmatang ti bulong ti karabasa, marunggay ken saluyot.

Kalpansanna, nagturongen nga agawid. Idi nakadanon iti rangtay a mangballasiw iti karayan, nalagip na tay sinuman a gatangen na. Masapul nga agsubli idiay tiendaan ngem aldawen ket masapul a lutoen ni nanang na dagiti ginatang na. Nagpanunot no ania ti nasayaat nga aramiden na.

"Ay, paunaek laeng dagitoy kappi nga agawiden ta makapagna da met," ket kinasao na dagiti kappi. "Umuna kay nga agawiden, ah, ta adda nalipatak a ginatang. Lintegen yo daytoy kalsada. Inton makitayo ti balay nga adda veranda na iti makanawan yo, isu daydiay ti balay mi. Umuli kayo ‘diay agdan ket inkayo idiay kosina. Ibagayo ken ni nanang a dakayo ti ginatang ko a kappi ket nagsubliak idiay tiendaan ta gumatangak pay it sinuman." Ket inibbatanna dagiti kappi sa nagsubli idiay tiendaan.

Apanan a baibbatan dagiti kappi nagturong da idiay karayan.

Kasta unay nga ayat ni Juan idi nakagatang ti sinuman. Kinnan nan iti sinuman idiay dalan na nga agawid.

"Aldaw unayen! Awan met la ni Juan a sumangpeten. Dandani pay sumangpet ni Tatang nan. Ay apo! Anian sa ket ti nasarakan na ‘diay dalanen?" ti madanagan a sao ni nanang na.

Iti saan nabayag, adda agsagsagawisiw a sumungad.

"Nanang! Nanang! Nakasangpet met la dagitay kappi? Nagdadakkel da! Siguro nalutom idan," ti impukkaw ni Juan.

"Ania? Siasinno ti nangipaoitam anakko? Awan met iti immay da inted," ti nasdaaw nga sungbat ni nanang ni Juan.

"Pinagawid ko idan, nanang. Imbagak iti nagnaan da idi adda kam idiay rangtay ta nagsubliak a napan gimmatang ti sinuman," impalawag ni Juan.

"Ay, anakko, ania pay ita ti sidaen tayo? Awanen, ah. Ammo aya dagiti kappi iti turturungen da? Ita awan ti sida tayo no saan la nga nateng nga awan sagpaw nan. Anosan tayon a ta ania ngarud," ti sungbat ni nanang ni Juan.

Kasta unay ti sangit ni Juan ta awan met iti sinda nan. Saan a nanganen ket inturturog na laengen ti bisin na.